終章：Home

保衛地球既戰士要回家喇。

         



尼泊爾機場。我有無消瘦到呀？

                     係波卡拉玩完之後就返加德滿都喇。會係呢到停多兩日。我同maggie 講8月尾先會返香港，其實係出發之前就一早諗住返去時比個big surprise佢！同埋我一直有聯絡拉薩既旅館老板。不過一路都買唔到火車飛。如果要返拉薩，可能要等一個星期先返到廣州。

                     最後我係波卡拉街邊既旅行社買左5日之後既機票返香港！頂你個肺，要成3千蚊港紙！！好貴呀！但無辦法，我真係好掛住女朋友.....雖然出發時，佢好似好瀟灑咁無咩野，但我走左個半月之後，就開始鬧情緒同埋發脾氣。令我非常無奈......



                 浪子基金用哂，返到香港一蚊都無........會面臨好嚴峻既問題！不過船到橋頭自然直～都已經跳左落火坑喇。無計，哈哈！


                 係加德滿都停既呢兩日，都係四圍行下，用單車繞城同埋買手信比大家。尼泊爾o的奶茶好好飲，我買左好多返去煮(雖然買時我已經知道，第時我會覺得煮奶茶好麻煩而唔煮)但我都忍唔住要買！因為太好飲！

我搵到一間非常平既地方食尼泊爾餐。仲要幾好食！

              我成日話自己係一個浪子，但我發覺原來我唔係。我唔想玩喇，我要返地球呀。其實踩單車時，我見到好多好震撼既景色都想帶埋maggie去睇。比如成天都係星星既時候，我好想帶埋佢出去嗌：嘩，嘩，嘩！頂你個肺呀！咁多星星既。去到尼泊爾其實我都係咁買野比佢。而家我成個背囊都係佢o的野。自己停落黎一個人玩好悶呀。出黎太耐喇。差唔多成3個月。


其實我想返香港唔係掛住香港，我係掛住佢先返黎～～haha



我諗過架喇，如果第時要做浪子既唯一辦法就係做低佢！等我無咩牽掛。哈哈




係加德滿都周圍搵，都係為左搵箱pack好架單車上飛機！其實我哂到個膚色真係好黑，不過唔係有型黑，係貧窮黑......好唔開心....嗚，我想喊

                         有一件好攪笑既野，就係有晚我同秋陽行行下街，秋陽就話sexy dance，sex 咁！點知前面個尼泊爾女仔即刻擰轉個頭用憤怒既目光望住我！我當堂覺得自己好淒涼，好傷心！佢一定以為我係o的咸濕遊客！佢未免太敏感喇掛，秋陽就係咁笑.......



走之前我地要合照。秋陽，小馬，770，恩哥

             第二日，倒屎咁早去到機場，買機票時條友同我地講要早三個鐘到機場，因為呢到成日塞車！之前o個日仲係咁搵的士要5點鐘係guest house門口等我地，而我就同小馬同770分手啦，佢地返拉薩搭火車。而秋陽就因為趕時間。同我一齊飛香港，再返大陸轉高鐵回家。


                去到機場時佢都未開門。比人滾左，早知就唔咁早黎........係機場仲遇到一班香港義工，我回鄉喇！人地仲同我講英文！well，you know, my english is very chicken 。咁就唯有用返我地既廣東話同佢講，你地行先啦咁樣！

呢件T-shirt 要成25蚊！好貴！

我個背囊全都都係手信

                   返到黎香港，係機場回收行李時，竟然.......竟然......我架單車唔見左！我屌(重音)你老母呀！！(憤怒指數爆燈！)咩事呀？咁大箱野都可以唔見？斷估佢都唔會跌左落飛機掛！我同秋陽等呀等，等左成個鐘都未拎到行李，但時間又好趕，Maggie 就放工啦woo！結果就決定唔等，咩都唔理喇，我同秋陽去報失先，之後送佢搭車返深圳。(架單車係幾日後,由國泰直接送返我屋企。原來當左貨物咁運左去另一個倉)我就直接叫司機全速飛去佢公司樓下！好緊張呀！因為小弟出左去70日，skip哂咩拍拖紀念咁，雖然我好老土同好80年代咁係左頁呢個鄉下地方寫左封情信比佢！



                 我之前一早同佢個朋友夾好，幫我約佢，話黎接佢放工之後食飯！當然啦，之後調包我頂上。係佢公司附近，望住佢打左個電話 (好有變態跟蹤狂既感覺...嘿嘿..)



「你係邊呀？有無掛住我。」我問maggie

「有呀，不過你都唔係到啦。」佢答我

「如果可以即刻見到你就好啦，你想唔想見到我呀？」我再問

「車！你有排先返啦，哎也，我唔同你講喇，我約左人食飯，佢仲未到，我要打比佢。」佢再答

「好呀！你信唔信你合埋對眼就會見到我呀喇？」

「痴線！」Maggie鬧我

「叫你合埋眼就聽我講啦。」

佢終於肯合埋眼 (好唔情願地咁做，但求快o的打發我走既樣.....)


於是我偷偷走近，係佢後面遮住佢隻眼

「估下我係邊個？」


佢擰轉頭：嘩！(抱)　

我回來了