聶拉木 五千米衝落山 玩命？

                      今日要翻兩座五千米既山，分別係拉龍拉山(5017米)同通拉山(5126米)........... (暈..)，由門布鄉出發，22公里既上坡！拉龍拉山呢22公里好苦！因為我地出門時落大雨！我隻手套濕哂！大風大雨，加埋係高山！溫度好低好低好低好低好低好低！我隻手凍到好痛好痛好痛好痛！呢次係成個旅程最後一次，亦都係最誇張既一次！因為落雨，凍到癲！隻手僵哂！呢22公里真係淨o的整死我！上到山頂我已經累到就崩潰！

                 但最危險既事亦都即將發生，我係呢個山頂，o的手指已經郁唔到，完全控制唔到自己既手指。凍到僵左！(我無誇張，當時既情況真係咁！)我好努力咁磨擦！我o的手指都係無反應！但而家要面對個問題係我要落山！要剎車！而我o的手指壞哂，"禁"唔到剎車！咁點算呀？落緊雨，條路好滑！就咁衝落山呀？會死架woo！不過係無得揀既情況下....................剎車壞左都就咁衝落山。成件事真係好恐怖！好恐怖！


                千祈唔好炒！千祈唔好炒！千祈唔好炒！我內心不斷重覆呢句說話！如果你係五千幾米衝返落黎，你就知幾恐怖！當時我隻腳不斷交替咁伸落地下，磨住個地，希望可以減速。

                   通拉山好難爬，最大原因係第一座山已經消耗哂我既體力！而家仲要爬第二座........而且雨一直都無停過。凍到我灰哂！個身唔凍，係我隻手好痛。痛到個程度係想切左隻手！係通拉山頂！有一個喇嘛住既帳篷。係一個老同埋嫩既喇嘛住既 。後生喇嘛好好客，請我地入去飲茶。得知原來佢係布達拉宮本部派黎呢到賣經幡去增加寺既收入。閒談左一輪之後，就要告別。因為我知道山下面有一個好得人驚既地方等緊我。


 通拉山頂，我係中國線最後爬既一座山

我已經崩潰左.....坐係到hand哂機

訓埋，頂唔住！真係有接近死亡既感覺

                      通拉山山腳，刮緊好大既逆風。風既猛烈程度係完全前進唔到。你企係到係會比佢吹到向後退。其實我一早就知道呢個地方會係咁，因為攻略有提過入聶拉木之前有一個風口。會踩得好痛苦。



聶拉木的藏語意思是地獄之門



聽個名就知道猛料...


                    呢段路踩到好灰，770同埋小馬踩得快，係前面已經消失左。當時我好想休息，因為好肚餓，我就咩都唔理，坐低係到食飯！雖然o周圍的風吹到呯呯聲，但我都唔理得咁多。屌！吹走我Ｙ笨！(爛仔本色！)秋陽係後面陪住我，一齊食午餐。

要踩上去，係咪好有趣呀？:(

               
Skip哂所有痛苦之後，大約幾個鐘之後就到左。


                到左聶拉木，安頓好之後。同小馬再有分歧。因為我想聽日直接穿過樟木，直接進入尼泊爾國境，但小馬想係樟木到停一日，第二日先過境。我唔想咁做既原因係聶拉木去樟木只有三十幾公里，而且係全程下坡，正常黎講一個半鐘就可以到達樟木！我唔想浪費大半日，想直接係尼泊爾境內休息，縮短未來既行程。不過我地得唔到共識。最尾我決定離隊。


                我打比maggie 同佢講，餘下既日子我會自己一個人踩去加德滿都。但佢好擔心我一個人出事！後尾我自己再諗下，無理由黎到呢到先出意外，死左無人知既。經過一晚考慮，我決定同大家繼續行落去。