夢要夠瘋 夠瘋才能成為英雄 騎行的終點

                啊！終點來了。要去玩喇。要到尼泊爾做背包客。由樟木一直下坡到海關。落到去仲要係過境大樓排隊。因為十點先開關！終於要脫離中國線喇！但有一個問題，行李要放係行李帶.....咁我地點算？成部單車放上去？？過唔到woo...結果就係海關用人手check，幾hea下，亦都無留難我地。不過開關時，我見到一堆尼泊爾人係另一邊跑過黎，衝呀！咁樣係對面跑過黎.....使唔使呀？乜有咁激動咩？

               過左友誼橋。正式進入尼泊爾。人地話尼泊爾關員會光明正大咁問你拎錢，如果唔比錢就唔比你過關。咁事實上我真係見到有人夾住o的錢係護照到比海關。但我呢種正義既使者，當然一蚊都唔會比！

           係尼泊爾境內，開始踩時人地先岩岩起身梳洗。尼泊爾慢我地2個小時15分鐘。所以計返時間，佢地先8，9點。 好正常。尼泊爾係一個谷地，同西藏既感覺唔同。但友誼橋之後人多車多，雖然係下坡，但條路好斜好斜，有o的危險。

 樟木海關

由樟木急速下坡到邊境。

回頭看樟木

過境大樓

黑炭

到尼泊爾喇

傳說中要比錢既海關

到尼泊爾的第一條橋

其實今日係會好趕時間，因為要一直殺到加都，而我唔知有幾多公里！我睇過o的資料，如果要一日係口岸直接殺到加都，係有o的難度架！好多人都會分開兩日。之前我都係咁打算，但小馬話佢朋友話好簡單，咁ok啦。都洗濕左個頭，係樟木到停多左日，而家唯有一日衝過去啦。

係尼泊爾踩單車已經完全唔同感覺喇！好多氧氣呀！每次呼吸都係夠架！我真係feel 到好多氧氣呀！好感動........(大家唔好以有氧氣係必然既事.....)可能佢係一個谷地，海拔低！有好多樹木，好幸福呀......


中途經過無數小村

爛路

爛得好誇張

        　仲聽講話去加都段路既路況好差，好多山泥傾瀉。又好多爛路！入境無耐我已經親身證實左係真架喇！係樟木時有好多人過境後就直接上左吉普車去加都喇！"呼"一聲就唔見左～但係呢段路就比我地追左上黎喇！因為佢地架車行唔到，要等對面o的車開過黎先。好似話已經等左好耐。


等待前進的吉普車

超越.....嘿嘿

個山漏水呀！

一 patpat的爛泥，踩上去好嘔心

而且段路仲要非常長

o的泥好大pat 架真係

佢地o的貨車整得好盞鬼

我在爛泥路中，在一群車中穿插

無意中發現路牌，但我覺得個里數好似唔多準

加德滿都：香港的後生仔來到了！嶺南大學出了個優秀份子！哈哈！今次呢個行為辣低哂其他人！返去講場seminar都得呀！ 哈哈哈(呢一刻自我感覺非常良好！保衛地球既責任交比我啦！)

終於見到一個大小小既城鎮

要搵地方食飯喇

咖哩飯！人地用手食架！我地當然唔會啦

熱到成身汗

呢到真係好熱呀！同埋呢，尼泊爾既水係唔飲得架！一定要買水　(溫馨提示)

如果分開兩日既話，我地係會係呢個bahrabise鎮到休息

其實計返條數，如果用中國時間計，我地過完境已經大概十一點，其實要係天黑前(六點)趕到加德滿都真係有o的困難架！因為中間仲要爬過一座山先到

要開始爬山喇！呢個山好奇怪，係咁轉彎，轉極都未到！大家都唔慣呢到o的又濕又熱既天氣，好辛苦！一直係後面。不過對於我黎講，反面好鬼輕鬆！因為呢o的咪就係香港平時既夏天囉！我就"呼"一聲，唔見左啦！因為我已經神奇地帶左頭！

往加德滿都途中的路

係呢到踩單車，我濕到滴哂水呀！流汗流到好誇張！

上山時，係間士多到補給！啪左兩枝可樂同埋一枝大水！無辦法，水份流失到好緊要！我好似比人扔左落洗衣機轉左幾個圈，未"瓊" 乾水就比人拉左出黎咁......係咁滴汗！士多老板知道我係成都踩單車黎到呢到，佢好害怕！(查實我估佢唔知邊到係成都！)  因為今日要係咁趕路，我無得係條路到擺pose照相！好悲傷

順帶一提，呢到o的巴士車頂都係載人架！

車禍發生了

貨車撞巴士，無人受傷！

沿路上有好多人同我地喊加油！

你見唔見到前面一堆樓呀！應該差唔多到喇

終於爬到山上頂！其實沿途都有好多軍人，唔知點解呢？唔通呢到既治安係好差既？

下山

塵大到呢............

其實已經開始入夜

係呢段路到，我突然覺得自己既夢想係到閃閃發光呀！於是我係段路到大聲唱歌

究竟個路牌指去邊，我係完全唔知架！唯有不斷問路

死喇，天黑喇！

仲未到既？

個天真係開始無光喇！


呢o的就叫邊線行車

                 落左山之後去加都既路上面，我炒左一次車，係因為o的車亂咁衝！而第二次，我差o的成個人飛左去路中心，差o的比車撞瓜埋！事緣係我係馬路既邊線踩單車啦，突然有個仆街司機唔知做乜9 ，突然切線，係我前面停落黎！仆街！剎唔切，我即刻扭車，結果當然係即刻衝左上馬路....你要知道尼泊爾o的交通有幾亂！我仲比佢架車"界" 損左！佢係咪食左屎呀？　識唔識開車架？後尾諗返，我應該當場就屌爆佢！

                 但可能當時太驚慌，skip左呢個動作......你都唔知幾危險，馬路o的車衝黎衝去，我突然轉左出去，真係無撞死要還神！




登登登！大獲！天黑了


完全黑暗的地方

其實有兩個鐘我地係完全黑暗咁踩單車

                 我一早都話要分開兩日架喇！雖然加德滿都係尼泊爾既首都，但佢係完全無城市規劃架！o的路亂78糟！又無街燈！發佢個瘟！真係比車車死都唔知咩事！係晚上十點既時候，我地就進入左加德滿都！但由於完全唔識路，又黑媽媽！我就拎住本lonely planet 既地圖用電筒照住問人Thamel係邊！呢段路簡直係惡夢呀！條路多車到呢............


                  中間又要搵guest house，由於條路黑媽媽，咩都睇唔到，我仲跌左落個大水窪入面，邊個係條路到挖個咁大既洞出黎呀？係咪痴線架！你搵野圍住佢都好呀..............卒知我成身都係污水咁去問路，總知就係狼狽啦。


                  最後終於搵到路啦，臨入Thamel前比班軍人截住，問我地去邊同住邊！我點知住邊姐，咪話搵緊guest house 囉！大佬，你睇我個樣黑到咁，成個走難既窮人咁！都唔慌有槍啦！快o的比我搵地方住喇！我就黎死啦兵大哥


                  搵左幾間guest house，又講左一輪價之後！我地係marco polo guest house 到住左落黎！(marco polo！好高級呀！哈哈，呢間當然係廢野啦) 450盧比一晚，圍返都係20蚊人仔到！都幾平！


                  之後即刻去食飯喇！為左慶祝踩完單車咁大件事，我決定豪食，用左成60蚊人仔食餐飯！！但問題係而家已經係11點幾......



大餐

           

           其實到左之後我就第一時間打比maggie，同佢講我已經完成左個單車之旅喇！當然我有問佢你男朋友係咪好有型，係咪好勁呢o的囂張說話！(大佬，讚下呀嘛)　而佢亦都係繼續敷衍我架.......用一把好誇張既聲音：嘩，你好勁呀！      妖..........


            聽日要開始玩喇！係電話到我突然之間醒起一件事，就係原來我因為去左旅行，skip左變形金剛3！呀！！！好傷心呀！好想睇！好想睇！我問佢，你睇左未呀？maggie: 睇左啦，好好睇呀！　呀！！我尖叫！！點解無我份！我墜入了萬丈深淵............雖然無左mega fox ！但我都好期待架......嗚


由於太累，食完飯返去沖完涼就係張床到死亡左.........不過無熱水...(他媽的marco polo)


           其實呢晚無咩特別既感覺，反而係踩入去加德滿都時，我感覺到全身熱血沸騰！真係感覺到有夢想係到發光！仲要係閃閃發光！本黎已經踩到，累到就黎癲架喇！但我一諗到.......終於踩到喇！！　嘩！我終於攻打到呢度喇！讓大家在我身上見識到堅持是甚麼東西！