樟木 離境口岸

                  由聶拉木去樟木既三十幾公里係全程大下坡！ 基本上你坐落架車到，佢就會自己行落去！有人話去樟木呢段路好靚好靚，叫呢到做江南峽谷，仲話呢到係最美既峽谷。唔知呢？因為我無感覺！畢竟騎過川藏線，對其他既風景都已經再睇唔上眼。

             樟木口岸係好繁榮既邊境，佢係沿山而建既地方，分開幾條街咁。唔知好彩定唔好彩，適逢西藏六十大慶，邊境管制得好嚴，所以入境既外國人唔係多！我地落腳既地方都唔錯。可以望到半個樟木。食埋飯就去左派出所蓋個離境印先，方便聽日離境。(後尾先知唔使咁麻煩，直接出境就得)


             因為聽日就出境，所以要補給一o的好緊要既野！例如廁紙。因為尼泊爾人同印度人既習慣一樣，係用手黎"聞"屎既　(請原諒我咁坦白.....)，所以一定要買定廁紙用！仲拎哂返拉薩既班車卡片，因為我地之後會返樟木，坐班車回拉薩。班車最平可以劈價到230蚊。講價既時候仲買左幾粒皮蛋！而家好鐘意生食皮蛋，就咁啪入口。好好食


路上

好多條小瀑布

小馬

山林中

靚？

大霧！

好多時會遇到咁，每次都好驚！因為完全睇唔到前面，驚比對頭車撞死

路又爛！

終於見到ATM

住的地方

沿山而建的樟木

有好多有尼泊爾特色既屋同車

樟木

房入面見到的景色

            呢到仲有YMCA青年旅舍，最盞鬼既係個staff 好靚，咁入面又有free wifi ，我同秋陽講不如我地一齊落黎上網。結識呢位靚女姐姐！哈哈。做哂所有野都只係三點！佢地出去行下，上網。我就訓係張床到無所事事，望下風景，整理下o的相，同埋寫低呢幾日發生既事。



              係大學入面，大部分學生都只當大學係一個職業訓練學校，讀大學 =　搵多o的錢，真係有幾多人會去關心我們當前身處既社會？一切置身事外。然後畢業，平平庸庸咁過生活。甘心去做一隻螞蟻。好多人既志願甚至係打份政府工，因為貪佢夠hea...


工作→儲錢→結婚→花光錢→再儲錢→買樓→生仔？



           我經常有一個問題 ：搵咁多錢，又帶唔到落棺材既..咁辛苦做乜？如果將所有時間拎哂去搵錢，咁人生究竟仲剩返乜？用接近三分二生命去搵錢，然後就慢慢用哂o的錢，跟住等死，然後再將呢個任務傳承比自己既仔女。咁既人生好悲哀。而且人既物慾係無止境，你有一蚊就想要十蚊；有十蚊就想搵一百蚊；有一百蚊就想要一千蚊。


咁同係條街到見到既螞蟻，成世都係到搬糧有咩分別？


係咪社會話比你知你要咩，你就要追求o的咩？係唔係應該思考一下自己既人生？



當一個單位話就話有400呎，實情得o個200幾300呎，賣緊二百幾萬。3成首期都講緊60幾萬。打工仔搵o個萬零蚊一個月。要儲幾耐先至有個首期？


為左個300呎都唔知有無既地方，奉獻二十年光陰？


社會既主流價值唔係一定岩




做人點可以隨波逐流？我覺得呢個行為好蠢呀！


生命已經夠短，人生眨下眼就過。點解仲要花時間去過別人既生活？點解唔好好享受生命？用自己既方式去活！


生命只有一次，一定要盡情活！自己既生命，由自己去演繹！唔可以比自己後悔！


人生要過得無怨無悔！直到我再唔識打開隻眼o個一日來臨既時候，我都可以笑住講一句：不枉此生！




當你為你生活遇到既事而唔開心，煩惱，埋怨，甚至放棄自己，覺得全世界都玩緊你，討厭你既時候！有好多人頂唔住自殺。但同時間，社會上有幾多身體唔健全，有重病既人好努力咁去掙扎求存，為既只係可以過普通人既生活。咁究竟係佢地有問題定我地有問題？究竟邊個先係殘疾人？





我唔敢狂妄到話要改變呢個世界，但最起碼，我想做一件事去影響我身邊既人。