波密 涉水而行 ，浸爛隻腳 第一次光顧公共澡堂 132公里

                   今日既路應該係好輕鬆，因為然烏到波密係全程下坡，下降海拔1200米到。但好多時意外就會係呢o的時候發生。我地當初咪成30幾人出發既，其實我地出發左第3日，係瀘定時就已經分成左兩隊，因為我地比較慢，又要去玩。人地就唔等我地，自己出發。不過呢隊快速隊去到理塘時已經散哂，理塘個段路太得人驚，搭左車既就唔爭在，繼續一直搭車去左拉薩 -_-，之後佢地係其他地方有人又炒車，有人被狗咬，有人又斷左貨架，踩唔到。總知就咩都有，而快隊既隊長　- 　雪狼( 呢個就真係解放軍喇，同我地既傻仔過兒唔同，人地之前去左非洲做維和部隊) 早兩日，都係呢到炒車，都話因為太舒服就會大意。下坡時快得滯，炒左。成架車壞左，要直接坐車去八一整車。就係咁，快隊宣佈行程終結。

                我地雖然慢！但我地安全第一(我唔想死左係西藏) 雖然我地隊都有人走左，不過我地而家既8個人個個都唔怕吃苦，決定左要一齊到拉薩就要一齊去到布達拉宮前面。

我地既大佬：門釘

我地一出發時就落雨，攪到有o的寒。

 牧民：羊群有時會打橫行，攔住哂條路。

呢到有個名叫咩東方阿爾卑斯山，可能因為天氣唔好！所以都唔係咁靚，如果藍天可能個情況會完全唔同，感覺可能會好澎湃。

感覺幾震撼的河

 同門釘帶頭，等緊其他人黎

 行行下，八月跌左個頭盔落河

開車既人經過比左枝長樹枝我地，你睇鷹哥幾開心，因為佢鳥返個頭盔返黎

 八月唔使死了，如果無頭盔，佢炒車的話，個頭可能會爆開。(謹記： 一定要帶頭盔!)

今日最pk既係落雨，而且中間經過一段幾長，而且係被水浸哂既路，無論點行，任你踩好，推好，你隻腳都會浸水。咁我唔理啦！大叫一聲就衝過去，卒知就浸哂水......都係老占醒目，先除哂o的野先踩過黎！我蠢左，早知就唔好咁衝動啦！嗌乜鬼姐.......因為咁，我隻鞋成隻都係水，出面又落緊雨，濕笛笛咁踩單車好唔舒服！踩左一朝之後我嘗試除左隻襪偷睇下我隻腳變成點，浸到白哂又霉哂......唉！可能因為成日都醃住隻腳，所以心情都唔係咁好，無咩影相。只想快o的到。

另一個出名既冰川，你睇大陸o的人改個名幾誇! 不過由於我地係海螺溝中過伏，我係唔會再參觀。

 　　　　　食午飯的地方     　當時 3:00pm ，仲要踩大約60公里先到波密。食飯既時候我除哂o的野希望佢快o的乾。著住o的濕野個感覺好嘔心

食完飯之後，要趕路，希望係7點前到達。但我突然有o的唔舒服，唔知係頭痛定肚痛，總知就暈暈地又無力咁啦。踩下停下，最尾要坐低休息

係呢到開始墜後，我唔舒服，門釘陪我一齊休息，佢話佢都要休息一下，叫我慢慢踩就得。　一路上我都受到門釘既照顧        好感動.....(流淚)

                    係7點之前我地就到左波密，安頓好之後，大家就決定去沖涼。因為已經3日無沖涼，我都頂唔緊喇！　唔記得同大家講，其實一路上無得沖涼係好正常，唔係唔想沖，而係無得被你沖。之前既小村無得沖，同埋西藏人唔興沖涼，人地一世人先沖三次涼，一次出世，一次結婚，一次死。波密既旅館都係無得沖涼架，要沖涼就要幫襯公共浴堂。盛惠八蚊位。

                   食飯時打左個電話比阿媽，話可能遲o的要入錢比我！頂你個肺，之前攻略又話5500可以包哂，邊得呀？佢個Budget係一定唔夠，日日食饅頭咩？阿媽問我有無事，我都好耐無打電話返屋企........

波密

旅館到貼左張紙係介紹有關墨脫，可能大家唔知，墨脫係全中國唯一一個未通車既地方，即係無路去得到，要走山路先可以到既地方。而如果要去墨脫，就要係波密到出發。有人去完返黎話　眼睛在天堂，身體在地獄。呢句野我成日見。我第一次聽係有人係去完西藏阿里返黎講。究竟佢地既苦有無我地咁癲呀？

我覺得自己都係處身係一個咁既情況，一路上既風景都好美麗，但我真係踩到就黎死亡。