然烏 全城停電一個月 ； 最漂亮的星星湖 90公里

      尋晚CC成晚都無返黎訓，門釘宣佈CC正式離隊！CC放棄騎行。所以我地起身之後就研究下點拆CC個貨架落黎比門釘用~ 但失敗........

     今日係大起伏路，不斷上坡下坡。不過上坡上得多，下坡下得少；上坡上得長，下坡下得短。呢段路係好痛苦！直到食lunch 前，走既路都係咁。

    而且我地成朝既話題就係，好無面子呀，CC跑掉了；好傷心呀，CC跟佬走。李哥就恥笑我地，話如果佢後生，一早就追左CC，而家你地唔追，人地覺得同你呢班人無咩意思，咁有人追當然就同人地一齊。更笑我地係沒用的東西........嗚.....過兒仲將我地改名為綠帽小隊。

好辛苦的路

你睇唔睇到我身後既路？上呀，落呀...成朝就係咁.....

路上經過的一條小村

    我地撞到去拉薩朝聖的藏民，西藏人一生會有一次，係屋企出發，一直跪拜到拉薩，祈求一生平安幸福。佢地通常會開架車，裝滿食物。朝早就開車去今日既目的地，之後佢地會行返轉頭，開始跪拜，直到返到佢地架車。呢個行程，大約要走2，3年至走到拉薩。

呢位哥哥仲對我地好有興趣，坐低休息同我地傾計。

當然要合照啦，你睇佢幾有型！

老占話要示範比個阿哥睇，佢既姿勢係咪拜得好正宗...

好多時候，望住前面既路，係咩都望唔到。你只能一直向前走，有信念，就可以堅持得到。

又上坡

經過里程碑3838 (即係八婆八婆既意思)，門釘佢地好興奮。除哂衫影相留念。我唔貼出黎喇。不過貼一張過兒啦......哈

可能大家太耐無近女色......

 我既朋友係咪好得意?

小型油菜花田，好鐘意佢開一半唔開一半。好特別

中間經過一條村，有個細路搵水喉噴我，未死過？

工作中的村民

青稞田

上山前的路，鄰近水力發電站

CC係呢個時候搭車經過，比左飲品我地補給。而19歲靚仔唔敢落黎，驚我地打佢，幾無出色！！！吼！

大隊休息中

    今日要翻安久拉山，海拔4475米。而爬山既路坡度非常緩，唔似爬山。我好輕鬆咁樣就第一個到左山頂！不過途中，我停低左落黎等佢地，人地平時都等我，我唔可以踩咁快。我係其中一個里程碑附近去左個小便。咁門釘一黎到就話好累呀，就扔低左架車，坐左係到。不過佢架車係訓左係我頭先小便個地方............Oh.....好嘔心呀....不過唔可以講出黎，如果唔係我會被人殺左。我臉容扭曲，儘量唔望架車.......好核突。

就係呢到.....

任你風吹雨打，行雷閃電，大風大雪。依然阻止唔到我地。向雪山進發！

這就是青春

山上面奇怪的東西

 安久拉山山頂

      攻略上面話落安久拉山既時候仲要踩腳踏，因為會遇到大逆風。唔知今日行咩狗屎運，竟然無刮風。好順利咁樣衝落去我地既目的地 - 然烏

下山

Oh！ 漂亮漂亮

要影相

到然烏前會經過呢o的蓋，因為呢段路好多落石，要快速通過！

毛主席.....唔知點解呢到寫句咁既野。

幹完一天活，回家的村民

進然烏鎮

   　進鎮後，先知道然烏停電，而且會持續一個月。不過都影響唔到我地。因為我地已經成為左原始人！生活係完全唔需要靠咩科技同埋電力。每日只係勞動，慢慢地向最終目標前進。而食飯時，李哥話係時候要幫我地車隊改個名。咁先有氣勢！我都同意，最尾我地成為......


 　 八仙車隊 -_- 不過直到去到拉薩為止，我地八個人都無分開過。由成都出發既30人大部隊，今日剩返幾多個人? 退出既退出，放棄既放棄，搭車既搭車。我地仲有700公里先到拉薩，但有人今日已經返到自己屋企。能夠成功騎完川藏線全程既人非常非常少。通常10個人入面只有2，3個人可以做到！


我地八個人，懷著相同既信念。無論發生咩事，我地都要用自己既力量去到拉薩。


  　   晚上，門釘突然拍門:香港仔，快出來看星星，整個天都係星星。我咁大個仔，無見過星星可以多到咁誇張。或者，生活係城市既我地，根本無辦法感受得到。身在一個高海拔既小鄉鎮，加上全城斷電，伸手不見五指既情況下，星星竟然係如此明亮。


      我地仲走左去然烏湖旁邊，去享受絕無僅有既時刻。我地沿住木橋，走出去湖中心，成個天都係星星。我係咪發緊夢？如果唔係我好想帶Maggie 同我一齊睇。此時此刻，真係浪漫到暈低。


      我自己一個人跑出黎冒險，好多時體驗到o的好震撼既野，都只能夠返香港之後描述返比Maggie聽，好可惜。呢個情況，就等於以前半夜，同阿龍開電單車走入越南既沙漠入面，坐係沙漠既小沙丘到睇星星。係星星既光下面，依稀見到沙漠既輪廓，周圍都係暗藍色，o個時就好似置身係阿拉丁入面既畫面咁，浪漫到暈。

然烏湖的星空