東達山 靈魂在震動 突破海拔五千米 ！

  

            今日要翻五千米既大山 - 東達山。五點鐘就要起身，個天都仲未光， 出去打水梳冼時，依稀見到成天都係星。係雪山底見到成個天空都係星星個畫面好浪漫。 但因為高山非常寒冷，出去擦個牙都凍到結左冰咁滯！ 我帶住就黎凍壞既身體出發。

            由山腳開始上山，我就開始瘋狂怒爆粗！ 恨不得炸左座爛鬼山。 但鬧左一陣就無哂力鬧喇， 因為踩上去辛苦到嘔電！ 而且海拔高， 講緊既係上五千米呀！ 高山反應又出現喇！


東達山　海拔5008米

              我個頭好痛好痛......痛到好似要裂開咁.....極度痛苦！但當時我個腦諗既只有上山！上山！！同上山！！！要堅持！堅持！！同堅持！！！！ 但期間太辛苦喇，個腦hand 左機，諗唔到野....一片空白。  得身體係到郁，對腳係到踩。跟住我係到諗...頂你個肺， 呢個trip 係for 一o的容易放棄既人鍛鍊意志，咁我係到做乜？ 我一早就知道自己既意志力非常強大，意志如鋼如鐵！ 決定左就唔會放棄， 我明知自己點都唔會放棄....點解我會係到受苦？


           當差唔多上到五千米既時間， 我已經抖唔到氣， 係咁扯蝦！ 但我既肉體都係到做緊運動！ 腦入面一片混濁既思想， 漸漸集中成為單純既信念！ 當連生存最基本既條件都滿足唔到既時候，連呼吸都成為困難。依然為心目中既理想奮鬥。我的生命正以最美的方式在燃燒


           萬籟俱寂，世界變成靜止，唯一可以聽到既聲音就係自己既喘氣聲同埋噗通，噗通既心跳聲。




山上的風景

漂亮的河

已經差唔多上到頂， 最後既六公里， 亦都係最痛苦既六公里！ 空氣好稀薄

行到一半仲有解放軍車隊...成條路都係灰... 我地要讓路， 仲做埋吸塵機！

      　山頂前既六公里係攻略上標示為最難既地方，要大家自求多福。 係呢到我停低左， 啪左一枝紅牛就殺上去.....真係好癲呀！ 抖唔到氣.....但我好似發左神經咁一路係咁踩，係咁踩。 不過我地都叫幸運。 因為東達山無落雪同埋刮大風， 如果唔係我實香消玉殞係山上....





堅持之後....




到了到了！  見到了！見到了！

有o的登山隊既感覺

我上到山頂既時候真心覺得自己man ，我真係有o的佩服自己(真心)~~哈哈

東達山  -  我征服了妳

許願的石頭

比個大招牌你地睇

我用最苦，最考驗自己的方法，走上了五千米的高山！   內心好澎湃

    　　　上到黎好開心！ 大家都錄左video 比親戚朋友睇，威下呀嘛！ 我都有錄， 我要話比maggie 知。 佢男朋友唔係佢身邊既時候，係進行緊o的咁勁既野！ 嘿嘿...


八月

過兒

金龍話要抱我！

老占

開車經過的人， 對我地壯舉非常震驚及佩服！ 忍唔住要同我地影相

下山前的告示！  危險！ 危險！

下山途中

隊長

         無驚無險， 去到左貢。得知尋日比我地早出發的朋友， 有一個因為太勞苦， 一日翻左兩個山， 而家吊緊鹽水..我忍唔住笑左...... 都話唔好硬爆上去， 又唔聽~~~   我地安頓左之後就去食晚飯， 去左打邊爐......店家比左間房仔我地。 呢個格局，令我好掛住宿舍既大家.....令我諗返起quit hall o個日， 好想返hall.........但已經無得再返去了。我地已經畢左業，大家各散東西....再唔可以半夜訓唔著，打開人地房門走入去吹水；係人地張床到碌黎碌去。


突然之間好難過