浪漫的青春冒險: 燃燒青春之旅始動　　　　　　　　155公里

2011年6月1日，終於出發！因為大家都好緊張，所以晨咁早4點就起左身..........明明講好左4點半先起身架嘛(淚..) 出去旅館外食左個5蚊既早餐，準時6點起程！ (小弟以前最遠都係由大圍踩去大尾篤！最大獲既係呢到先得20公里) 而今日要踩155公里先到目的地- 雅安！今次釘硬....

出發前: 超級大隊伍 ( 30人！)的合照！ ( 究竟有幾多個弟兄可以克服重重困難踩到拉薩？ )

成都

　一開始我好高興～有幾個原因既：第一係因為太早，路上無咩車，唔係咁危險！之前幾日係成都踩單車，我覺得好鬼恐怖！o的車真係直接片過黎架！第二係因為我都keep 到成20km/hr ！我心諗， haha~ 無事了今次！點知一個鐘之後我既時速就慢慢下趺到17-16公里！仲開始有o的累既感覺！而我正為我既"變速"苦惱之際，有條肥仔 - 蒼狼！就同我講話無所謂。你keep到呢個速度就可以，佢話佢自己都用呢個速度踩~~ 仲同我講自己好有經驗 ( 呢個不幸既肥仔..去到旅行既中段，失禮到喊)

往成都機場的方向：門釘的背影

　　
好野！係出發2個半小時之後，我已經成為包尾的朋友！！ (大佬呀！我都唔想架..-_-)，門釘同鷹哥係後面壓陣。門釘問：香港仔，是不是不行了？我心諗：頂你個肺，好累呀！！但我答：我還不習慣，你們先走！不用等我~~ 其實後面仲有個叫小曼既後生仔，都係第一次踩長途單車，都係踩唔掂！我內心當然就好高興啦！因為有人陪我包尾~ 唔使咁大壓力呀嘛~哈哈

遠影係我身邊踩過

門釘竟然成為第一個爆胎的朋友！唔好睇我無事無幹咁企係到，查實我已經累到嘔，乘機休息！黑色衫無左個頭既就係小曼，幾個鐘之後，佢件衫會爛哂....

　　　我就黎死喇，要踩77公里先有得食飯......期間踩到有個地方整緊路，我無裝擋泥板， o的泥飛到我成口都係..*%&^*@

而係其中一個路口到見到3個車友係到休息！我同過兒，老占同八月既相遇就係呢到開始

我一直踩最尾... 而門釘係前面一邊等我，一邊開西瓜食，2蚊1斤甜西瓜！點解可以咁平？

食住西瓜等我的隊友！門釘，金龍同埋鷹哥

　係我隻腳就黎斷之際，終於！終於！！比我踩到食飯既地方，而我地進入飯店既時候，前面十幾個快既車友已經食完飯又出發。而門釘亦都宣佈會休息一個鐘！謝天謝地... 等你講呢句等左成朝...

　點知食完飯無耐，又話要走喇！唔係呀嘛！有人話我地人太多，怕阻住人地做生意！！我當時絕望了....我隻腳好酸，好痛呀.......但路都係要走！! 出門無耐，有個小上坡，攻略話如果呢個時候要推車,，就要小心你既體力唔夠捱日後既路！但我想講我踩呢段路勁爆辛苦......連飯都就黎嘔返出黎........但為左面子，我唯有繼續踩.............

    而朝早同我一齊包尾既小曼，係食完飯已經唔見左人！頂你呀！要包尾就一齊啦，咁無義氣既！！唔通佢頭先偷偷地啪左丸仔？咁鬼快既... 豈有此理！

　　　突然之間，一件嚇怕所有人既事發生左。由於我一直包底，前面o的人已經消失哂。得返我同門釘係後面~但去到一個大斜路既時候，見到一件恐怖既事！我見到8月企係路邊，而旁邊有個爛哂衫褲既血人...仲有幾個當地人係到，我即刻走過去睇下咩事！原來小曼貪快唔剎車落斜路，成架車飄起左，跟手跌左落去側邊既山坡到。連人帶車一路鏟 + 碌左落山坡......

　你應該有見過o的人熱得滯，係頭髮到滴汗出黎！而小曼當時就係，成頭頭髮都係滴緊血...成身既衫褲都爛哂，損哂...而塊面就界開左...個鼻仲見到骨....當時已經報左警，但大陸o的999 又唔知要等幾耐，大家嚇到面都青埋，唔知比咩反應！而我就為小曼檢查傷勢，睇下佢有無骨折，之後再幫佢洗傷口同緊急既包紮！ (我當時十分慶幸自己細個有參加st. john)     當我攪完一輪之後，白車終於黎了！我地亦都趕去名山醫院睇下小曼點

　　醫生話佢無咩事，只係皮外傷！但睇到小曼包到好似木乃伊咁，今鋪鐵定毀容了！望住停係醫院外面，成架撞到彎哂既單車..... 心都寒埋。我地第一日出發就有人要退出，小曼留係醫院休息，聽日就會坐車返成都

       由於比小曼既事阻礙左我地既進度，大家又要趕路去雅安了，所以我踩左一陣又比大家拋離。後尾我直情唔理，自己坐係路邊食哥哥買比我既糕點！當時有其他隊既車友經過，有問我需唔需要幫忙，我就耍手叫佢地走先，唔使理我！我休息夠先再出發，踩左2公里之後，先發覺大家停左係到等我....仲好擔心咁問我點呀咁。嗚......... 好感動！

進入不知名既隧道，當時仲係白淨同埋係可以著短褲的！