攻略上指示今日休息，要睇下漂亮的然烏湖，我地當然好樂意休息。問一問老板點走過去大湖區，佢話好近之嘛，跟住佢隻手指，指左去另一邊，行過去半個鐘之嘛。老板：自行車就不用帶了，路很難走啊。聽到佢咁講，o個時我內心就已經有o的虛，希望老板唔好欺騙我地既感情，但為左穩陣起見，我地都係帶埋單車出去
然烏湖
我都預左，通常當地人話好近既路，你將佢講既乘返幾倍路程就係，豈有此理！今日唔通又係休息變勞動？踩左1個鐘到(你睇，踩單車都一個鐘，你估行要幾耐呀喇?) 大家都無咩心踩，過兒索性求其搵o的樹呀，草呀遮住自己架車咁，慢慢行！既然係咁，大家就係附近既一塊空地著陸算～
雪山
大哥，你想點呀？好嘔心呀...
我地係左邊踩入黎...好在有帶車。
二十世紀少年既基地就係呢到，真係有條路走入草堆架！朋友就係呢到出現架喇
感受一下然鳥湖
但好可惜.......
呢班人真係太耐無掂過女人。嗚.....我以後仲邊有面見人woo (淚)
呢到住既人有養一大堆羊
民居，間哂地黎養動物
佢間屋既入口好靚呀！
瓜左既毛牛
中年人與湖 (希望李哥唔好睇到呢篇野，唔想被人鬧爆我~ha)
其實環境真係幾優美，因為呢到仲未開發！希望唔好被咁多人發現呢個地區啦！你要知道中國人民幾咁擅長毀滅一個自然景點。
再行入小小，天唔再陰！ 影相開始靚
呢個地方得唔得呀？
聽講呢到冬天既時候，成個湖會結左冰，成個湖區白茫茫一片！我睇過相，好靚的！如果大家咁岩經過咪去睇下
多手整左張effect，效果我又幾鐘意，唔使錢請大家睇下
hea左成個上晝，我決定返飯店睇下湖。其實尋日我地係偷偷地潛入人地間旅館到影相。因為係湖旁邊既旅館得一間。由於尋日既星星太靚，我同李哥決定搬屋，入住呢間飯店，方便觀星。成50蚊一晚架，好貴。不過我心諗，如果係香港要住呢種地方，800蚊都唔可以住到，所以我就搬左入去了
湖上的木屋
有條小木橋，由於而家係停電既日子，晚上會點蠟燭係條橋到。(Shit，使唔使咁有feel？）無相提供，請大家自行幻想畫面
入面仲有好多位比人坐，我係到吹住雪山既風，望住個湖。好舒服
望出去的風景
我忍痛用五十蚊租左呢間房!! 好貴架喇，平時我住開十五蚊架喳！
人物特寫：門釘
我的同伴
晚上，停電。個個人都拎住枝蠟燭，好有味道。其實走出去外面既主店到，佢係有架柴油發電機自己發電既，咁岩我又見到有電腦，咪多口問佢可以上網架呢到？老板話無問題，我就即刻跑返入房，畢竟我已經有十日上唔到網，要update 一下情況比人知，如果唔係人地以為我係路上死Q左。係facebook到打左篇note。話比大家知我呢十日生活係荒山野嶺。仲通知大家我仲有700公里就到拉薩，唔使擔心。有個女仔見到我用facebook，好驚咁既樣！咁同佢講可以翻牆架，佢就問我借黎一用，當然無問題啦。咁我就四圍貢下，出去轉個圈
外面咁岩黎左幾架越野車，E...講廣東話既，o的人一睇就知我係廣東人(因為佢地一同我講野就係用廣東話，唔係用普通話)都係傾下計咁。佢地知道我係踩單車黎，又係呆左既反應。大家知道我要上珠峰，千叮萬囑叫我小心o的。當時係佢地架車前面，就有人跌左落山死左。仆街，唔係嘛.......我有o的驚woo。對話如下:
廣東人：你去珠峰？
恩哥：係呀。
廣東人：你小心o的貨車司機，仆街，o個時我地前面有架電單車，後面有架貨車開上黎，咪呠佢囉，但o的貨車個大喇叭會響到人耳嗚。屌佢個老母，個電單車司機比佢嚇一嚇，搖左一搖就跌左落山，死左喇。
恩哥：唔係呀....咁能恐怖？
廣東人：咩唔係呀，呢到o的貨車司機無乜人性架。你跌落山又唔關佢事既，又捉唔到佢，佢理得你死咩。同埋呀，你之後會經過既老虎嘴，早兩日先有架私家車跌左落去喳嘛，仲比條江沖走埋。人都搵唔返呀。
恩哥：我會小心架喇！
夜晚訓教時，我同李哥講返呢件事，佢話係呀 ，老虎嘴o個到係個天險黎，成日有車跌落去。不過我地踩單車既安全o的。因為係自己踩，可以控制到。但你坐車，個司機一唔小心就整死你呀.....(我深深明白，理塘斷軑盤單野)
又問下佢點解黎踩川藏線，李哥原來唔知我無踩過單車，佢自己之前踩左一萬公里先夠膽黎挑戰川藏，話我係一個奇材，而且又夠膽一黎就踩川藏線，覺得我好利害。李哥咁講攪到我有o的唔好意思。好多人好似門釘，李哥，老鷹佢地咁，後生時一直都好想踩川藏線，但因為種種原因而不能成行。直到三，四十歲之後先毅然辭左份工或者請無薪假出黎，去完成年輕時既夢，呢o的就係男人既浪漫！我係廿十幾歲就做左佢地後生時想做既野。唔使抱憾多年。我想，所以我行動。我當初決定做呢件事係無錯，年輕真好。:)
半夜，想出去睇星星，不過烏雲密佈，咩都睇唔到，我點左枝蠟燭，靜靜咁坐係外面。
沒有留言:
張貼留言