八一 色季拉山； 終於回到城市，最後一次休整 71公里

   
  　　　　　　今日又無得食飯，一早就去左間饅頭店到買午餐(唉) ，　入面好古老，係中國o個o的舊廚房，燒柴，入面熱氣騰騰，全部都係白煙。我好似返左古代，店小二！黎！比十個饅頭我！兩文錢唔使找。

                     今日既色季拉山好難，超難，特級難爬呀！呢25公里痴哂根！25公里爬升海拔1300米！(請幻想大圍踩去大尾篤條路變成盤山路，請再加長五公里，and then 係不斷上斜路)真係好變態。辛苦，超級辛苦！唔知係咪因為已經幾日無爬山，平時爬山都無乜野，今日真係極度痛苦。過兒一直係最後，佢係後面一邊嘔白泡，一邊推緊車上山；老占今日肚痛，佢踩一陣，就要去廁所(周圍拉屎)，攪到面都青埋，我每次見到佢都忍唔住笑！攪到無哂力。

魯朗看到的雪山

         　　　　  上山既路成十分鐘先走到一公里，我想自盡，極辛苦。中段其實我係睇住里程碑做人，睇住幾耐先走到一公里。但最衰既係佢有時竟然會skip左個里程碑，可能兩公里先一次，我真係想死，心諗仲未踩到一公里？唔係嘛？我死架啦woo！

                       我同李哥仲有門釘一齊坐係到休息....頂你個肺！因為過兒係山腳到搵左架車搭到八一！　佢本身已經上左車架喇！但佢一搬架單車上人地架車到，人地就壞車喇！　係咪好得意呀？佢唯有死死地氣咁踩埋上黎，所以我地就要等埋佢喇！成兩點半先上到山頂，但我地八點出發。累到暈左係到.......呢座山癲架

上山途中的風景

我黎到喇～　(搖旗吶喊)

當你踩左一朝，累到喊之時，你終於見到山頂，但條路........你有無o的衝動想爆粗？

如果天氣好，今日係山頂係可以見到南迦巴瓦峰，可惜我地無咁好運。

今朝四圍賴屎既老占，你睇佢面都青埋

林芝

終於.....拉薩

好心影我o的相就唔好手震啦

落山時就到左林芝地區，我地買左個西瓜食。　到八一前有條好靚，好靚既河。

          我地終於見到城市了！自從出左雅安之後就一直係鄉村！今日終於回到城市！

亦即係意味我地快到拉薩了！

                        第二日起身，無乜特別野做，hea 下，上下網。其實今日係唔使休整，不過大家心知肚明。大家都只係唔想咁快到拉薩！好矛盾！想快o的到，又唔想到！到左拉薩之後，意味著要同大家分開。而且呢次一別，可能要好耐先可以再見。而我可能無得再見tim！我儘量都唔去諗呢o的野。

八一入住的青旅

上網的兩人

陪伴我們一起旅行的朋友

雙人房

25蚊一個人，抵到喊。

我黑到成舊炭咁

外面

               今日去左睇呢到既柏樹王，好大架！但入場費要成25蚊！唔想比呀-_- ！後黎聽當地賣西瓜o的小販講，話當地人入去係唔使錢既。咁金龍就假扮當地既農民，因為好多河南人係到種西瓜賣！(金龍係河南人)我地係路上用兩粒糖收買左一個小朋友話比我地聽，當地人點行入去柏樹園到。最後我地成功潛入

逃票的路

其實真係好大

門釘拍埋去係幾咁細粒！

     　呢到既旅館老板同我講，千奇唔好曝露出我係香港人既身份，佢話早幾日因為有香港人黎左，比公安發現，就直接帶到拉薩，直接送你返香港！(因為西藏六十大慶，驚我地o的香港人攪屎掍)！唔係嘛，你唔係黎到呢到先送我搭車呀？咁我就好驚比人捉走啦！大家都決定從今日開始唔叫我做港仔。費事有事發生。但李哥就話你去到拉薩，大大聲同人講話你係香港黎，公安即刻送你返香港！機票錢都唔使比，幾爽呀！！我當堂勁開心！（後尾先知係假既，因為旅館要接待我地香港人要有接待外國人既牌照，無錯！香港人算係外國人！如果比人知道佢招待我，佢會好麻煩，所以老板呃我)