各位我又去踩單車啦
今次我整左個sponsor 計劃，大家可以既話咪幫下拖囉！我會好開心架！！
https://www.indiegogo.com/projects/super-printer-man-cycling-10-000-miles-in-asia/x/8866144
新章 ： 新的冒險故事
早兩個星期，突然為這次旅行想到一個Slogan
All about dreams
我想表達的意思是
後記 ： 活著就是夢想
夢想是人的靈魂
能活著真的太好了
有人說過
眼睛是靈魂的窗口
那麼
在我的眼裡，你看得到未來嗎？
回來香港已經三個月，畢業禮也舉行了。坐在下面的看枱上，竟然非常非常非常緊張。估唔到我呢條仆街都有大學畢業既一日！(不過大家對我讀得成書都好有意見～～哈哈)
I wana be free 波卡拉
波卡拉係尼泊爾第二大既旅遊城市，最出名既係trekking，即係係雪山上面行幾日至幾星期咁，風景好靚好靚！比雪山包圍住，我見有好多人係雪山上面影左好多好浪漫既相！woo！我都好想浪漫一下呀！ 其他好玩既仲有paragliding同埋激流！
由奇旺去波卡拉，車程又係咁死咁長......而且一直都落住好大既雨，當然一落車就會比人圍住，大家都搶o的遊客去自己間guest house！
我是一隻小小小小小鳥！
美麗的荒唐 奇旺國家森林公園
我地將架單車停泊係guest house，係尼泊爾玩完之後先返黎加德滿都拎車。因為無論如何，我地都要係到坐車返樟木。我亦都開始聯絡係拉薩既老板，請他幫我開始找黃牛火車票。因為係拉薩到，返廣州既車兩日先得一班。如果買唔到卧鋪，坐硬座回家既話釘硬，因為要坐56個鐘！非常變態。
我地幾個7點鐘就好興奮咁係guest house 門口，等人黎接我地搭車。展開我地3日兩夜既National park 之旅。不過架車搭左成六個鐘先到奇旺，我坐到屎忽都爛咁滯。你會發覺好神奇一樣野，就係係National park入面竟然有wifi！
夢要夠瘋 夠瘋才能成為英雄 騎行的終點
啊！終點來了。要去玩喇。要到尼泊爾做背包客。由樟木一直下坡到海關。落到去仲要係過境大樓排隊。因為十點先開關！終於要脫離中國線喇！但有一個問題，行李要放係行李帶.....咁我地點算？成部單車放上去？？過唔到woo...結果就係海關用人手check，幾hea下，亦都無留難我地。不過開關時，我見到一堆尼泊爾人係另一邊跑過黎，衝呀！咁樣係對面跑過黎.....使唔使呀？乜有咁激動咩？
過左友誼橋。正式進入尼泊爾。人地話尼泊爾關員會光明正大咁問你拎錢，如果唔比錢就唔比你過關。咁事實上我真係見到有人夾住o的錢係護照到比海關。但我呢種正義既使者，當然一蚊都唔會比！
聶拉木 五千米衝落山 玩命？
今日要翻兩座五千米既山，分別係拉龍拉山(5017米)同通拉山(5126米)........... (暈..)，由門布鄉出發，22公里既上坡！拉龍拉山呢22公里好苦！因為我地出門時落大雨！我隻手套濕哂！大風大雨，加埋係高山！溫度好低好低好低好低好低好低！我隻手凍到好痛好痛好痛好痛！呢次係成個旅程最後一次，亦都係最誇張既一次！因為落雨，凍到癲！隻手僵哂！呢22公里真係淨o的整死我！上到山頂我已經累到就崩潰！
門布鄉 簡陋的小村；古代打水機
今日行程好短，只有60幾公里，可以遲少少先起身！係預備出門既時候，我個胎又爆左！維修大師小馬幫我再補過條胎。而且經過一輪檢查後，發現係鋼絲出左問題！所以不斷係入面拮爆條胎！結果就係要拆左條鋼絲，我諗應該仲可以捱到去加德滿都既。
崗嘎既珠峰觀景台
崗嘎 試煉之門 最苦的路 74公里
不得不記，今日係自成都出發以來，最苦既一日！
要繼續旅程有兩條路揀，一係就踩 or 搭車返白壩，重新係個分叉路口出發。第二個選擇就係直接殺到去崗嘎。 嗯...點講好呢？其實條路好似一個反轉左個三角型咁既，珠峰就係左上角，白壩就係個底到，而我地要去既係右上角既崗嘎！好似好易揀姐，直接去崗嘎咪得囉！ 事實就係，由珠峰去崗嘎係無路既，無正式既公路去到。
根據攻略形容：
此路其實就是抄近路的越野車壓出來兩條車輪印。路況較珠峰路來說，還要糟糕些(唔係呀？唔好玩啦！仲有得再爛？)很多地方坡度很陡，基本靠推了，路面出現很大的鵝卵石路面，顛得人頭痛。其間會出現一個60 多度的超級陡下坡.......
係最後，我地以不走回頭路為大前題，揀左走呢條不歸路。(唉....)
竟然要過河？呢個世界真係咩事都會發生！我踩到就崩潰喇！吼！
我為自己的信念而活！ 讓我驕傲一輩子
電影：賽德克 - 巴萊
如果只能像動物一樣活著。那我寧願像英雄一般死去，用我的生命譜出永不屈服的歷史
瘦小既我，連120磅都唔夠！但架單車連埋行李差唔多有我一半咁重！我究竟係點樣帶埋佢地翻過十幾廿座四千幾，五千米既山架？平時係香港吹下風扇都會病既潺仔(唔係講笑，我真係試過)！究竟係點樣黎到呢到？唯一可以詮譯既，大概就係意志可以成就一切！
珠穆朗瑪峰 讓我驕傲的理由
珠峰上美麗的星空
令人崩潰的珠峰路 ； 巨大的意志可擊敗一切
今日就係挑戰珠峰既日子，好興奮！不過路途艱苦，所以行程會分開兩日！
朝早起身，又落雨，好討厭！如果好似尋日咁又變落湯雞就死喇.....好在佢落左一陣就停，出左城六公里會見到檢查站！因為珠峰接近邊境，要有邊防証先去到，如果有尼泊爾簽證就不在此限。
白壩 下雹，大雨 ； 明天上珠峰！ 83公里
今日晨咁早就要起身，6點天都未光就要起身執野，因為要爬26公里既上坡路，小馬有同反騎新藏o個兩個痴線仔通電話，佢地話呢個山如果逆風踩既話要成九個鐘(倒地...)我地不得不提早出發。出發時經過去阿里既路牌，如果有機會，我都要走一趟。
拉孜 平淡的一天 90公里
今日一起身就落雨，仲要係幾大雨。本來6點半就應該起左身，但因為太大雨就訓多一個鐘！但大雨都係無停既跡象。但無論點，都要準備出發。而且今朝發生左一件好不幸既事，就係門釘比我既氣筒唔見左，我翻過所有行李同埋其他地方都搵唔到！希望日後我唔好爆胎啦......
上山苦況
吉定 油菜花田的世界 61公里
今日可以訓到7點半先起身，因為今日既行程只有61公里，可以慢條斯理食完早餐先出發。朝早係35公里既起伏路，即係不斷上斜落斜，有小小累。中間休息時撞到以前係二朗山時見過既深圳車友。今日實在好得閒，所以攻略先叫我地踩埋聽日既路！
日喀則 ；終於殺到後藏 後藏風光無限好 輕鬆的一天 105km
7點起身，出發去宗山古堡，我想去睇下！但旅館老板同我講話入面咩都無！得間空屋，咩都無得睇！所以最後就無上去！宗山古堡個故事係當年英國人入侵，藏族勇士奮死抵抗！最尾守唔住，勇士們全部跳崖！其實我覺得佢地好有型！寧死不屈，好man！好浪漫呀！！我好鐘意佢地呢份剛烈！寧為玉碎，不作瓦存！好值得後人敬佩。如果佢地當初投降，就唔會受到後世既尊敬。
今日既路好易走，無咩難度！係上好既水泥路，而且今日有lunch食！！好感動，因為唔使食饅頭了 T^T
卡若拉冰川 ； 在雪山旁騎車 104公里
由浪卡子出發17公里平路！出發五分鐘就唔知點解有o的累！頂你個肺！後尾我先發覺條路係暗斜咁賤格！我一邊踩，一邊諗，點解一公里可以咁長？有古怪！係呢一刻我懷疑個里程碑係壞既! 足足走左30公里先上到上頂。嘻嘻！趁無人睇到既時候，我推左一公里既車！哈哈！好似做壞事咁。好驚比人睇到咁無型～～
上到山頂，同卡若拉冰川好近！所以決定爬上去，但爬左50米發現唔掂了！我斷氣喇！唉，無辦法！高原係咁架喇～所以我就決定碌返落黎！係冰川旁邊影左好多可以擺係枱頭既相！ 仲咁岩遇到香港既旅行團！ 呀！學秋陽講，我遇到老鄉呀！出黎咁耐，第一次遇到香港人，人地問我做咩黎呢到？又問我撈咩？點解有咁長既假！(嗚...好傷心，人地明明得個十幾歲～haha) 我話岩岩大學畢業，出黎grad trip ( 算係掛，其實我唔當佢係grad trip) 不過話時話，人地通常畢業就去歐洲backpack！但我唔同呀！嘩！咩事呀！ 我踩單車去左西藏，踩去珠穆朗瑪峰呀！呢個勁抽呀！完全同其他人唔同level，個感覺大約差100倍！哈哈！諗起就開心！ 但講左一陣就要落山喇，因為今日仲有另一座山要爬！(倒地痛哭.....嗚)
雪山與我
爬岡巴拉山 看羊湖 差點被分屍...... 84公里
六點就要起身，因為要爬岡巴拉山。傳聞話呢座山好變態， 所以我唔敢輕視佢！7點正就要死出門口...好耐無爬山!!
出門口大概一個鐘到， 全個旅程最恐怖既事發生喇！ 前面有架車係對面線迎面而黎。正係我地就黎並排之時，係我架車前面大約2cm 有塊野快速打橫飛過，仲係有破空之聲.....我即刻停車，.對面架車亦停低左檢查，後尾發現係個碌中間o個塊銀色鐵片飛左出黎.....oh! my god！ 如果我踩快小小， o個塊鐵片就會欄腰劏開小弟.....斃命當場！ 點解o個塊野都可以飛出黎， 真係聞所未聞！見所未見！ 大陸真係無奇不有！死左都唔知咩事......
要出發到尼泊爾 重新上路 ；傳說中既 Double rainbow 70公里
今日係旅程下半部既開始，希望同新隊員可以夾得黎！新隊員有四個人：小馬，秋陽，770同埋我！ 今日既行程只有70公里， 可以話係好輕鬆！不過可能太耐無踩單車， 同埋偷左太多野! 攪到架車重左好多!!! 臨走時我搶左佢地好多野， 比如金龍個拖板座啦， 過兒個軟座啦，老占既護膝啦，門釘個車鎖同埋氣筒等等，回收既東西太多，不能盡錄
秋陽，770，恩弟，小馬
我在拉薩沙沙滾的日子 ； 無論如何都要堅持自己既想法！
到左拉薩已經一個星期，係拉薩既生活節奏好慢， 好舒服， 好hea，呢幾日都係四圍逛，我亦同旅館既老板混熟左， 老板好好人! 煮飯又預埋我，平時又介紹o的藏族朋友比我認識~ 有時成個下晝就同佢係到飲啤酒，傾計。 夜晚就同佢o的朋友飲藏族青稞酒，青稞酒好似益力多咁既味。唔似係酒，你唔覺唔覺就會飲左幾桶。所以好易飲醉酒。呢幾日我一路係到痴飲痴食～哈哈
老板以前都係踩單車黎拉薩架，但佢到左之後就唔想走， o個時佢手上只係得返2千蚊人仔， 之後左借右借，攪黎攪去， 卒知就係到開左間旅館~~到而家黎左五年，分店都已經開左兩間。我同老板好岩傾 ，我發覺夠薑一條友出黎流浪既人既性格同諗法都係差唔多～！
布達拉宮
拉薩
佢同我想像中既印象完全唔同，唔係蓋滿土房子既地方，拉薩係一個城市
由於同我腦入面既拉薩有太大落差既關係，所以即使我身在拉薩，我都覺得呢到唔係拉薩，或者唔係我心入面嚮往既拉薩。
黎到拉薩之後，無預期中既興奮。唔知係咪因為呢到並唔係我既終點，所以我無咩特別既感覺。但黎到既第一晚既慶祝飯係非常大魚大肉既。我係路上答應過門釘，黎到拉薩我會同佢飲酒。(因為佢一路上叫我飲酒，我都拒絕，大佬呀！佢地飲o個o的酒係烈酒，我飲一定釘)，但今次無得講喇！不過門釘放過我，比我飲啤酒，唔使我飲佢地o個o的～
其中有一日我地去左參觀布達拉宮，呢幾日好難買到票，所以我地走左去報鴨仔團。我對宗教野唔係咁感興趣。但黎到拉薩無理由唔入布達拉宮參觀一下。可能我無咩慧根，我覺得有小小悶。
最壯麗的入藏之旅！ 來了就不能退縮 ！
4點我第一個跳起身！竟然咁好彩撞到停電！黑媽媽，開住電筒食碗雞蛋麵，跟住就要上路喇！因為今日要走178公里！一定要好早出門，八個人摸黑出發，(我仲因為一路踩車，個頭一路望住星星，而差o的炒車)一開始就有28公里既上山路等緊我地。我地一邊怪叫，一邊出發！(唔好見怪，因為今日到拉薩！大家難免有o的興奮，差在未跳開心舞！)
米拉山係川藏線最高既山，最高既山果然係最後先挑戰！意外既係唔太難爬。但令人沮喪既就係當以為轉個彎就到山頂既時候！竟然！竟然係另一個Z路！oh！shit！我忍唔住講左句粗口，可能因為期待落空，而且仲有一段咁鬼死長既路，所以最尾呢段路就辛苦喇！因為太傷心喇。
米拉山
松多 明天我們一起到拉薩 98公里
尋晚CC同我地住同一間旅館，我地想搵個o靚仔架車出黎，然後吉穿佢兩條胎！(幾賤，哈哈)但佢太醒目，特登唔泊係CC架車旁邊！我同過兒落去搵唔到目標就走左喇！
不祥的里程碑
工布江達 重遇CC ； 追殺發瘟狗 130公里
出門無耐就係路上撞到CC，原來佢都仲有踩單車，不過唔係同我地踩咁解，係同19歲既o靚仔兩個一齊踩。其實今日大家都知道會遇到CC。因為係八一既時候，八月去睇醫生時撞到CC，大家都因為一個月黎左兩次M既原因去睇！原來醫生話唔可以飲太多紅牛。佢地一日o拍兩枝，當藥咁食，醫生通知佢地唔可以再飲。所以我地知道CC都係八一，不過佢無黎搵我地。
當大家今日見到CC時，都無咩點理佢....大家覺得佢粒聲唔出就咁走左去同第2個踩，好無意思。一路上大家同甘共苦，大家都照顧過CC，覺得CC太無義氣。咁當時就好尷尬。我唔想咁，而且係呢件事上面我又無咩特別感覺。事但啦，佢唔想同我地一齊踩咪由佢囉。所以我係咁多人入面表現最正常o個個，我同佢講左幾句，我將過兒係魯朗夢遺既事講左佢知，我話過兒呢幾日都唔捨得洗條底褲，就係諗住見到你時送比你。我同CC傾計o個時，19歲既o靚仔一直係好遠好遠咁等佢，唔敢行埋黎。大家就商量不如用石仔扔佢！哈哈
八一 色季拉山； 終於回到城市，最後一次休整 71公里
今日又無得食飯，一早就去左間饅頭店到買午餐(唉) ， 入面好古老，係中國o個o的舊廚房，燒柴，入面熱氣騰騰，全部都係白煙。我好似返左古代，店小二！黎！比十個饅頭我！兩文錢唔使找。
今日既色季拉山好難，超難，特級難爬呀！呢25公里痴哂根！25公里爬升海拔1300米！(請幻想大圍踩去大尾篤條路變成盤山路，請再加長五公里，and then 係不斷上斜路)真係好變態。辛苦，超級辛苦！唔知係咪因為已經幾日無爬山，平時爬山都無乜野，今日真係極度痛苦。過兒一直係最後，佢係後面一邊嘔白泡，一邊推緊車上山；老占今日肚痛，佢踩一陣，就要去廁所(周圍拉屎)，攪到面都青埋，我每次見到佢都忍唔住笑！攪到無哂力。
魯朗看到的雪山
鲁朗 排龍天險；爛路結束 71公里
呢一帶係著名既泥石流同埋滑坡區，所以有個國家地質公園博物館區係附近，通麥出門轉個彎就到。 再走兩步會見到通麥大橋，亦都係今日我地要通過既橋，但呢條爛橋竟然係交通重地？有武警把守。要過去對面，要先等對面既車先過黎。我地呢o的騎車既，都唔係好佔地方姐？做咩唔放我地過去？一等就等左半個鐘。等緊既時候同個兵阿哥傾計，佢話平時訓練，4個鐘就可以跑到去鲁朗 。即係一個鐘跑17公里？呸，發瘟架你！呢到去鲁朗 71公里，仲係山路。你跑車黎架？當然我無當面笑佢，一陣佢老羞成怒，一槍打瓜我就死。
旅館，成間都比人寫滿哂留言
通麥 濃霧騎車； 終結之路 國道318的終點 92公里
幹你娘(請大聲用普通話唸一遍)，一出門竟然係一個長上坡..........今日總體應該都係下坡既，我要再強調一次！！係應該係會發生下坡呢件事！波密到通麥係海拔下降600米！咁搵人話我知點解門口有個長命斜？
其實尋晚我己同大家開會，要大家小心今日既路，因為會通過102塌方區，而且之前有一段路係死過兩個自行車騎士，佢地跌左落山！(其實成條川藏線係成日發生意外，而且亦都經常死人)，我一路上都好擔心究竟我可唔可以平安返到香港？都仲未到拉薩，我就已經有幾次差o的飛出車同埋"達"落山既經歷.........
一出發就爬坡 ，令我充滿怒火
波密 涉水而行 ，浸爛隻腳 第一次光顧公共澡堂 132公里
今日既路應該係好輕鬆，因為然烏到波密係全程下坡，下降海拔1200米到。但好多時意外就會係呢o的時候發生。我地當初咪成30幾人出發既，其實我地出發左第3日，係瀘定時就已經分成左兩隊，因為我地比較慢，又要去玩。人地就唔等我地，自己出發。不過呢隊快速隊去到理塘時已經散哂，理塘個段路太得人驚，搭左車既就唔爭在，繼續一直搭車去左拉薩 -_-，之後佢地係其他地方有人又炒車，有人被狗咬，有人又斷左貨架，踩唔到。總知就咩都有，而快隊既隊長 - 雪狼( 呢個就真係解放軍喇，同我地既傻仔過兒唔同，人地之前去左非洲做維和部隊) 早兩日，都係呢到炒車，都話因為太舒服就會大意。下坡時快得滯，炒左。成架車壞左，要直接坐車去八一整車。就係咁，快隊宣佈行程終結。
我地雖然慢！但我地安全第一(我唔想死左係西藏) 雖然我地隊都有人走左，不過我地而家既8個人個個都唔怕吃苦，決定左要一齊到拉薩就要一齊去到布達拉宮前面。
我地既大佬：門釘
悠閒日子？ 遊然烏湖
攻略上指示今日休息，要睇下漂亮的然烏湖，我地當然好樂意休息。問一問老板點走過去大湖區，佢話好近之嘛，跟住佢隻手指，指左去另一邊，行過去半個鐘之嘛。老板：自行車就不用帶了，路很難走啊。聽到佢咁講，o個時我內心就已經有o的虛，希望老板唔好欺騙我地既感情，但為左穩陣起見，我地都係帶埋單車出去
然烏湖
然烏 全城停電一個月 ； 最漂亮的星星湖 90公里
尋晚CC成晚都無返黎訓，門釘宣佈CC正式離隊！CC放棄騎行。所以我地起身之後就研究下點拆CC個貨架落黎比門釘用~ 但失敗........
今日係大起伏路，不斷上坡下坡。不過上坡上得多，下坡下得少；上坡上得長，下坡下得短。呢段路係好痛苦！直到食lunch 前，走既路都係咁。
而且我地成朝既話題就係，好無面子呀，CC跑掉了；好傷心呀，CC跟佬走。李哥就恥笑我地，話如果佢後生，一早就追左CC，而家你地唔追，人地覺得同你呢班人無咩意思，咁有人追當然就同人地一齊。更笑我地係沒用的東西........嗚.....過兒仲將我地改名為綠帽小隊。
好辛苦的路
邦達到八宿 再見CC ; 傳說中的72拐 95公里
今朝又係5點起身，奇怪，點解早到倒屎既時段竟然會有咁多人? 去廁所竟然要排隊?早餐店爆棚。原來尋晚咁岩有一隊自駕遊既朋友住左係到。佢地見到我地踩單車，問我地係邊到踩黎 。佢聽到我地踩過左東達山，佢地個樣顯得非常驚慌。佢地話自己開車上去都頂唔順。唔能夠相信我地用血肉之軀征服左座山!見到呢班人呆左個樣，我有o的沾沾自喜既感覺！呵呵，香港人就係咁堅架喇！
今日翻亞拉山，海拔4658米。濕濕碎~~係邦達一出發，竟然被狗追，不過我地人多，唔驚！o的衰狗就係咁欺善怕惡，係我地人咁多既情況下，佢地唯有逃走！哼! 走遲半步就劏Q左你地黎食，咩呀！大陸食狗肉唔犯法架。
天又光喇，究竟我試過幾多日摸黑出發?
邦達 川藏線已完成一半 103公里
攻略上寫今日既行程係休閒級別！因為全部都係平路！結果今日成日CC就係咁話呃人！的而且確今日既路無咩特別， 係長左o的姐。而且間唔時要上下斜咁囉。
出發時要先經過一條藏村
翻山後休息 鷹哥出走 ; 情書寄港
今日大家決定休息，翻山後需要調整
天未光老鷹就自己一個人走左，因為佢覺得休息係浪費時間。我地都無辦法留得住佢.....今日大家決定去河邊洗車，不過我之前都講過，我唔係咁好呢o的野，但大家咁有興緻，我唯有一齊去。(內心係打算去到玩水) 中間仲經過警察局，佢出面放左塊告示板，上面貼滿左交通意外既相，係o的人爆頭呀，甩手甩腳咁o個o的相。其中有特別多o靚仔爆頭 or 腸，唔見左手腳既相(無打格仔)。因為呢到o的小朋友好興開電單車，所以條路成日出意外。睇完o的相，我有小小想嘔
天未光老鷹就自己一個人走左，因為佢覺得休息係浪費時間。我地都無辦法留得住佢.....今日大家決定去河邊洗車，不過我之前都講過，我唔係咁好呢o的野，但大家咁有興緻，我唯有一齊去。(內心係打算去到玩水) 中間仲經過警察局，佢出面放左塊告示板，上面貼滿左交通意外既相，係o的人爆頭呀，甩手甩腳咁o個o的相。其中有特別多o靚仔爆頭 or 腸，唔見左手腳既相(無打格仔)。因為呢到o的小朋友好興開電單車，所以條路成日出意外。睇完o的相，我有小小想嘔
美麗的河流，但我地係佢入面洗單車............
東達山 靈魂在震動 突破海拔五千米 ！
由山腳開始上山，我就開始瘋狂怒爆粗！ 恨不得炸左座爛鬼山。 但鬧左一陣就無哂力鬧喇， 因為踩上去辛苦到嘔電！ 而且海拔高， 講緊既係上五千米呀！ 高山反應又出現喇！
東達山 海拔5008米
訂閱：
文章 (Atom)